RIGODON SA KAMPO NI NOYNOY AT MAR INAABANGAN

Hindi pa pala plantsado ang lahat tulad ng inaakala ng nakakarami. Malakas ang ugong-ugong na ang kampo ni Senador Noynoy Aquino at Senador Mar Roxas ay humaharap ngayon sa isang malaking intriga patungkol sa aktwal na pagpapatupad ng kanilang plano na “Noynoy-Mar” tandem para sa dadating na eleksyon sa 2010. Ayon sa isang tagapagmasid sa kampo ng Liberal Party ay posibleng magkaroon ng isang rigodon at magkapalit ng pwesto sila Noynoy at Mar kung saan si Mr Palengke ay babalik bilang standard bearer ng LP at si Noynoy ay babagsak para maging kandidato ng partido sa pagkabise presidente, ito diumano ay mangyayari bago matapos ang kasalukuyang taon.

Ang pagdeklara kay Noynoy sa labanan ng pagkapangulo at ang pagtanggap naman ni Mar bilang ka-partner nito ay hindi nangangahulugan na sila ay opisyal nang mga kandidato. Ito ay isang plano pa lamang na maaaring mapalitan lalo pa’t hindi pa nakapaghain ang dalawa ng kanila-kanilang opisyal na candidacy sa COMELEC. Hindi diumano papayagan ng grupong tinatawag na “The Firm” na maging pangalawa lamang si Mar. Ang grupong “The Firm” ang siyang nasa likod ng kandidatura ni Mr Palengke at tumutulak dito upang tumakbo sa pagkapangulo.

Ito ang isa sa mga pinanghahawakan ng grupong “The Firm” kasama na ang umiinit na intriga sa pagitan ng mga ibat-ibang grupong maka-Noynoy na ating namang natuklasan na pare-parehas palang naghihinanakit dahil sa sobrang pagkiling ng unico iho ni dating Pangulong Cory sa kanyang mga kapatid at ibang miyembro ng kaniyang pamilya sa tuwing may gagawing hakbang o di kaya ay bubuuing mga plano para sa 2010. Dahil dito ay nakakaramdam ng pagiging “out of place” ang mga kilalang miyembro ng Hyatt 10, ilang LP members at iba pang civil society groups na masugid na ipinalutang ang “Noynoy for President” sa kasagsagan ng pagluluksa kay President Cory Aquino.

Ang ganitong klaseng pagtatampo o ang pakiramdam ng pagtraydor ay pwedeng mag-udyok sa mga grupong ito na tuluyang talikuran si Noynoy at iakyat ng muli si Mar Roxas bilang kanilang kandidato sa pagkapangulo. Hindi ba’t kung sa ngayon pa lamang ay hindi na nila lubusang nahahawakan sa leeg si Noynoy ay posibleng sila naman ang ilaglag nito sa panahong ito ay magtagumpay sa 2010 at siya namang ika-uunsyami ng kani-kanilang mga personal na plano?

Ang posibleng pagririgodon ni Senador Noynoy at Senador Mar Roxas ay isang kaabang-abang na kaganapan sa bakod ng Liberal Party na una nang nag-akalang may malaking bentahe dahil sa mistulang mainit na pagtanggap ng mga tao sa Noynoy-Mar tandem. Ngunit ang ningning ng kahit ano mang bagay o tao ay lilipas din kung siya ay napapalibutan ng mga tao o grupong sisira dito.

KORINA BINUKO NA NAPWERSA LAMANG SI SENATOR MAR ROXAS

Dahil sa emosyonal na pag-iyak ni Korina Sanchez noong Setyembre 1, 2009 sa Club Filipino in Greenhills sa San Juan habang ang kaniyang katipan na si Senador Mar Roxas ay nagdedeklara ng pag-urong ng kaniyang kandidatura sa pagkapangulo sa 2010 ay napatunayan ng marami na ang nasabing kontrobersyal na “withdrawal” ay hindi talaga bukal sa loob ni Mr Palengke bagkus siya ay napwersa lamang na gawin ito.

Mali ang inaakala ng nakakarami sa ating masang mga kababayan na ang mga luhang iniiyak ni Korina noong araw na iyon ay dahil nawala sa kaniya ang pagkakataong maging unang ginang ng bansa sa panahong naging mapalad sana si Mar sa eleksyon. Kung susuriin, si Korina Sanchez ay isang kilala at tanyag na personalidad na at inirerespeto ng mga tao sa kaniyang napiling larangan kung kaya’t hindi siya desperadong makamit ang titulo bilang “first lady” ng bansa. Sa totoo lang, ang mga luha ay bunsod ng isang sikreto na pinakakaingatang huwag mabunyag sa publiko.

Ayon sa isang mapagkakatiwalaang source, ang kawawang si Mr Palengke ay kinuyug lamang ng kaniyang mga kapartido upang umatras sa laban at magbigay daan sa biglaang pagkandidato ni Noynoy sa 2010. Bukod sa pagkuyug ng kaniyang mga kasamahan sa partido, napag-alaman din na ang pag-atras ni Mar sa 2010 ay isa sa mga binigay na kondisyones ng tinatawag na civil society groups upang sila may patuloy na sumuporta kay Noynoy at sa kaniyang magiging laban sa dadating na eleksyon.

Alam ng tao na marami ng dugo, pawis, luha at pera ang ginugol ni Senador Mar Roxas - sampu ng kaniyang pamilya at mga taga-suporta - upang siya ay makalibot sa buong bansa dahil sa kagustuhan niyang ipakilala ang kaniya sarili sa ating mga ilang milyong kababayan sa ibat-ibang parte ng bansa. Bago pa nagdeklara ang ibang presidentiables ay malinaw na malinaw na sa lahat ang gustong tahakin na landas ni Mr Palengke. Ngunit dahil sa biglang pagsulpot ni Noynoy sa listahan ng mga presidentiables ay nauwi sa wala ang mga naging puhunan ng kawawang senador.

Ngayon, bukod sa paghanga sa kaniyang ginawang pagpaparaya ay dapat kaawaan din ang katipan ni Korina Sanchez dahil siya ay malinaw na napagkaisahan ng kaniyang mga kapartido at ng mga grupong malalakas sa ating lipunan sa ngayon.

MAR ROXAS INGGIT SA DINNER SA NEW YORK

Hanggang saan kaya balak paabutin ni Senador Mar Roxas ang mga patutsada laban kay Gloria para lamang makakuha ng pogi-points mula sa mga taong bayan na pilit niyang nililinlang? Bukod sa pagmumura sa isang rally, pag-atake sa Cheaper Medicines Bills at palabasin ang kaniyang bersyon bilang mas maganda at masunog sa bandang huli, pasuot ng kwintas na bawang sa senado at pagsasawsaw sa usaping kalusugan ni GMA ay tila may bago na namang pauso si Mr Palengke - ito ay ang busisiin ang napabalitang dinner sa isang restoran sa New York at gamitin na naman ito para sa kaniyang political strategy.
Maiintindihan sana natin ang ganitong balitaktakan kung valid issues lang ang magiging palitan sa magkabilang nag-uumpugang kampo pero masyado naman yata pinababa ng senador ang usapan sa lebel ng ordinaryong tsismis lamang dahil sa kawalan ng ebidensya sa kaniyang mga paratang. Halatadong-halatado tuloy itong si “boy bawang” na pilit nitong isisiksik ang sarili sa mga maiinit na isyu mapag-usapan lamang at mabigyan lang ng pagkakataon na makilala para sa plano niyang pagtakbo sa dadating na eleksyon.
Hindi kaya ito konektado sa naging maugong na balita dati na kaya biglang umatras si Senador Ping Lacson sa kaniya planong pagkapangulo ay dahil may namamagitang alyansa sa dalawang senador? Ito ay ang nabunyag na alyansa na papanalunin ni Ping si Mar at proproteksyunan ng naman ng huli ang una sa mga kasong kriminal kapag nakapwesto na. Eto ba ang dahilan kung bakit masyadong papansin ngayon si Mr Palengke na dati-rati naman ay hindi niya ginagawa? Mukhang nahawaan na ni Mr Exposé si Mar Roxas at siya na ngayon ang ginagawang mikropono aka spokesperson ni Ping Lacson para bigyan ng kredebilidad ang kaniyang mga patutsada kay Ate Gloria.
Alam na alam kasi ni Ping na gasgas na gasgas na ang kaniyang pangalan at ano mang pasasabugin nito laban sa kasalukuyang administrasyon ay ikakataas lamang ng kilay ng sambayanang Pilipino at iisipin na pilit niya inililihis ang usapan para proteksyunan ang kaniyang sarili.
Mag-isip sana si Senador Mar Roxas na hindi sa anu pa mang gimik politikal siya maboboto sa 2010. Hindi pagsuot ng kwintas na bawang o sa pagsawsaw sa mga isyu mapapansin ang isang kandidato dahil ito ay karaniwan na natin nakikitang ginagawa ng mga ibat-ibang presidentiables na lakas loob na humaharap sa ating mga Pilipino at lumiligaw ng boto mula sa atin. Kung gusto talaga ni Mr Palengke makapwesto sa Malacañang ay mas marapat na valid na mga isyu lamang ang kaniyang gamit sa paghamon ng balitaktakan at sa ngayon pa lamang ay ilaglag na si Ping Lacson sa mahigpit na pagkakahawak nito sa kaniyang saya.